寒底體質既人，身體會比較虛弱，鍾意食暖野辣野，冬天既時候手腳會好凍，容易頭暈，成日覺得好無力，懶懶散散，當食左少少涼既野食，例如西瓜，苦瓜，冬瓜，綠豆，魚生，沙律，飲涼茶等就會出現頭暈，想嘔，反胃，肚痾等問題。相對黎講，寒底既人適合食溫熱既野，係冬天更加適合進補，例如食羊肉，高麗參等。
至於熱底既人，身體相對會比較強壯，鍾意食凍野，容易便秘，口乾，仲有時會發脾氣。當食左少少熱氣野後，例如辣野，羊肉，咖啡，荔枝，榴槤，煎炸野後，就有機會喉嚨痛，生暗瘡，痱滋，訓唔到覺等等。熱底既人就適合多食清潤的食物，例如白菜，青瓜，綠豆等。
當然，以上講既都只係基本既分型，中醫理論中再會細分唔同既情況，千祈唔好以為自己熱底就不斷食涼野，咁樣好易攪出個大頭佛，令到自己既脾胃功能差左，引發其他問題。
